各位朋友，我同Honey已經響11月23號結o左婚啦！頭一個星期o既婚姻生活既迷糊又帶甜蜜，好夢幻，但係完全係 disoriented，因為我變成有兩頭家，但係又好似兩頭家都唔係真係自己屋企咁，成日搵唔到o野，又唔知o的o野響新居定娘家，都幾 lei hei。

(原文太長，評分見另文)

原先聽天文台講，話23號會轉涼兼落雨，又係超好日，都唔知幾驚會亂七八糟又塞車，但係結果果日風和日麗，又無塞車，所有事都好順利，多謝大老細！不過，總括來講都係果句，正如唔好旺季去旅行咁，千祈唔好響超好日結婚！好彩我今次用o既公司都係好pro，先無大件事發生，如果用著o的公司唔係咁負責任o既，又或者真係接o左太多單o既，錯漏百出，咁就慘啦！

Big Day令我知道o的長輩真係好鍚我！三嬸好似佢自己嫁女咁，仲開心過我阿媽。我上頭果晚佢一上來就攬住我恭喜我，差o的搞喊我(我即刻要轉話題，頂住！)仲送o左對龍鳳鈪俾我！其他親戚朋友個個都好俾面 --- 久未露面o既人例如我舅公同Honey o既舅父、阿叔都o黎飲，個個都好開心爭住同我o地影相；其他長輩個個都好鍚我，搞到我對手都戴唔哂佢o地送o既「兵器」！

 

仲有一眾兄弟姊妹，個個都出盡力。兄弟們真係話頭醒尾，有義氣又有實力；姊妹們個個俾足面，打扮到花枝招展不特止，當日成件事o既氣氛又好，我唔使出聲都即刻撲埋o黎幫我，背後又幫我打點一切，真係令我當日完全無後顧之憂！呢班兄弟姊妹真係一流呀！反而到最尾係我「蝦碌」，趕住開席，兵荒馬亂之間竟然忘記o左同o的姊妹影多o的相，誠為我婚禮中最失敗o既事！

蒲記o既朋友都唔話得，雖然請唔到佢o地去飲，但個個都做突哂禮（你班傻佬傻婆！就算o黎飲都唔使咁大禮啦！）到蒲記拆禮物果時，真係俾佢地嚇完一跳又一跳。仲有，大佬個仔病o左，佢都o黎觀禮；Jane一教完琴即刻飛車出o黎… 搞到我超感動~~

多謝大家！