凸首話香港地仲有好多200萬以下o既樓，咁o岩我地間屋o既租約又就o黎到期，而我地死做爛做十幾年都係夠俾200萬以下樓價o既首期，於是就去做一次實地考察，睇睇港島區200萬以下o既樓盤係點o既。

原本凸首話，上車可以搬遠o的，都有道理o既。但係我同honey都響港島區返工，6299住香港仔，年紀有番咁上下，honey又係個孝順仔，想晚晚放工之後可以番阿媽度食飯，睇下兩個老人家有無o野要幫手，所以想搵番香港仔區o既樓。有人話要上車，去屯門或者天水圍啦。我響屯門大o既，娘家亦仲響屯門，可以話你聽屯門樓價都已經飛升，加上出市區返工o既車錢同時間，可能會比住市區更貴。而且我由屯門出市區返學返工已經捱o左十幾年，真係唔想再每日比人地用多兩粒鐘搭車o勒。

講番睇樓。果日約左個好young  o既女經紀，佢帶我地睇o左3個盤，其中2個響美x閣，低層叫價17x萬，建築面積485尺，實用面積得200幾，1996年(13年)樓，做o左開放式設計，只係用板同磨砂玻璃間一間房，房板同大門之間放一張兩坐位沙發，對面就係廚房同廁所門口，連飯枱都擺唔落。再上去高層一個望海(即香港仔避風塘)同一座向相同面積o既單位睇，叫價19x萬，原裝一房間隔，但係間房細到連張床都放唔落。（我地依家住緊果間屋都係4百幾尺，張床都已經cut短到唔夠6尺，honey平瞓果時頭同腳都會掂到牆...）基本上，honey一見到間房放唔落張床o既都唔會考慮 (你知啦，床同睡房對夫妻關係係好重要o架嘛...)

有時我都好佩服港島區人克苦屈身、認命、做「順得人」o既o既忍耐力，地產商起樓起到明屈你(個身)，都仲有人買。不過，我地呢幾年睇o左近30個市區盤，都有唔少係咁o既。香港，基本上只係俾人搵錢，無預人響度住o既啦！

之後個經紀帶我地睇添x大廈一個單位。36年樓齡，中層500尺單位，上面同隔離都做緊裝修。我地響果度只係逗留o左唔夠10分鐘，已經被佢嘈到頭痛。對面打開o左門，見到個格局同我地睇果間一模一樣，一開門就係個開放式廚房，仲要係用明火o既，而且單位無第二個出口，咁o既裝修真有違反消防條例之嫌。個經紀話因為隔離幢商場就o黎開，o的業主覺得會帶動呢邊o既樓價，所以有好多單位都番新放盤，仲話依家唔買，遲o的仲貴。但我諗到o既只係香港仔舊墟都係一幢商場一幢住宅o架啦，旁邊多一幢商場唔多，少一幢唔少，都只不過係一個業主高價「出貨」o既借口。

Fact就係咁多，證明港島區真係有200萬以下o既樓盤，不過應唔應該買，就真係見人見智o勒。呢次睇樓感受最深係個女經紀o既態度，一副「200萬咁細o既budget，無錢就唔好學人買樓」o既嘴臉，好似200萬唔係錢咁。睇3個單位，響第2、3個單位度都話「我諗呢個廳都大過你依家住緊果個廳...」，查實我地住緊港島西區400幾尺o既屋，個廳同添x果間500尺o既差唔多大，我住緊果度約20年樓齡，證明香港o的樓o既實用面積係愈來愈少。睇樓期間一邊同我地講話都有一、兩萬價講o下o既，但係有電話入o黎講第二個樓盤，佢就話「阿x生本來話有得傾，家陣佢企硬唔減啦！」營造一種無議價空間o既氣氛。 

響吹得咁熱o既樓市情況之下，咁o既態度都可以理解，但我最唔滿意o既係佢誤導我地。第一，關於添x大廈，呢幢樓響1994年曾經塌簷篷，業主立案法團差o的要清盤賠償俾死傷者，當年都算係幾轟動o既新聞。我問佢呢件事，佢話「唔係呢幢，係隔離(起緊商場果邊)，同呢邊無關。」咁舊o既樓，又發生過一件同樓宇結構有關o既事，銀行做唔做按揭都係一個疑問。佢依然以我地o既budget做著眼點，話九成未必按到，不過七成應該得o既！

佢又話2015年香港仔會有地鑯，到時o的樓仲貴。查實2015年落成o既港島南線東段去到黃竹坑就會過鴨脷洲，經香港仔市中心去數碼港o既西段仲未落實！大家可以睇番港鑯發布o既資料：

等我仲以為佢真係收到勁風添！原來全程都係想盡辦法，氹你落搭！